ਭਾਰਤੀ ਮਹਿਲਾ ਟੀਮ ਖੋ-ਖੋ ਵਿਸ਼ਵ ਕੱਪ ਦੀ ਬਣੀ ਚੈਂਪੀਅਨ, ਫਾਈਨਲ 'ਚ ਨੇਪਾਲ ਨੂੰ ਹਰਾਇਆ

ਨਵੀਂ ਦਿੱਲੀ- ਭਾਰਤੀ ਮਹਿਲਾ ਟੀਮ ਨੇ ਖੋ-ਖੋ ਦਾ ਪਹਿਲਾ ਵਿਸ਼ਵ ਕੱਪ ਜਿੱਤ ਲਿਆ ਹੈ। ਟੂਰਨਾਮੈਂਟ ਦਾ ਫਾਈਨਲ ਐਤਵਾਰ ਨੂੰ ਇੰਦਰਾ ਗਾਂਧੀ ਇਨਡੋਰ ਸਟੇਡੀਅਮ ਨਵੀਂ ਦਿੱਲੀ ਵਿਖੇ ਖੇਡਿਆ ਗਿਆ। ਭਾਰਤ ਨੇ ਨੇਪਾਲ ਨੂੰ 78-40 ਦੇ ਵੱਡੇ ਫਰਕ ਨਾਲ ਹਰਾ ਕੇ ਖਿਤਾਬ 'ਤੇ ਕਬਜ਼ਾ ਕਰ ਲਿਆ।ਖੋ-ਖੋ ਵਿਸ਼ਵ ਕੱਪ ਨਵੀਂ ਦਿੱਲੀ ਵਿੱਚ 13 ਤੋਂ 19 ਜਨਵਰੀ ਤੱਕ ਖੇਡਿਆ ਗਿਆ। ਭਾਰਤੀ ਟੀਮ ਟੂਰਨਾਮੈਂਟ 'ਚ ਅਜੇਤੂ ਰਹੀ, ਜਦਕਿ ਨੇਪਾਲ ਨੂੰ ਫਾਈਨਲ 'ਚ ਹੀ ਆਪਣੀ ਪਹਿਲੀ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਪੁਰਸ਼ ਟੀਮ ਇੰਡੀਆ ਵੀ ਫਾਈਨਲ ਵਿੱਚ ਪਹੁੰਚ ਚੁੱਕੀ ਹੈ, ਉਸ ਦਾ ਸਾਹਮਣਾ ਵੀ ਨੇਪਾਲ ਨਾਲ ਹੈ।

ਮਹਿਲਾ ਖੋ-ਖੋ ਵਿਸ਼ਵ ਕੱਪ ਦਾ ਫਾਈਨਲ ਐਤਵਾਰ ਸ਼ਾਮ 6 ਵਜੇ ਸ਼ੁਰੂ ਹੋਇਆ। ਨੇਪਾਲ ਨੇ ਟਾਸ ਜਿੱਤ ਕੇ ਬਚਾਅ ਕਰਨ ਦਾ ਫੈਸਲਾ ਕੀਤਾ। ਭਾਰਤ ਨੇ ਪਹਿਲੀ ਪਾਰੀ ਵਿੱਚ ਇਕਪਾਸੜ ਦਬਦਬਾ ਦਿਖਾਇਆ ਅਤੇ 34 ਅੰਕ ਬਣਾਏ। ਦੂਜੀ ਪਾਰੀ ਵਿੱਚ ਨੇਪਾਲ ਨੇ ਪਿੱਛਾ ਕਰਦਿਆਂ 24 ਅੰਕ ਇਕੱਠੇ ਕੀਤੇ, ਇਸ ਵਾਰੀ ਵਿੱਚ ਭਾਰਤ ਨੂੰ ਵੀ ਇੱਕ ਅੰਕ ਮਿਲਿਆ। ਅੱਧੇ ਸਮੇਂ ਤੋਂ ਬਾਅਦ ਭਾਰਤ ਨੇ 35-24 ਦੇ ਫਰਕ ਨਾਲ ਬੜ੍ਹਤ ਬਣਾਈ ਰੱਖੀ।ਤੀਜੀ ਪਾਰੀ ਵਿੱਚ ਭਾਰਤ ਨੇ ਲੀਡ ਹੋਰ ਵੀ ਵਧਾ ਦਿੱਤੀ। ਟੀਮ ਨੇ ਇਸ ਵਾਰੀ ਵਿੱਚ 38 ਅੰਕ ਬਣਾਏ ਅਤੇ ਸਕੋਰ 73-24 ਆਪਣੇ ਹੱਕ ਵਿੱਚ ਕਰ ਲਿਆ। ਚੌਥੀ ਅਤੇ ਆਖਰੀ ਪਾਰੀ 'ਚ ਨੇਪਾਲ ਸਿਰਫ 16 ਅੰਕ ਹੀ ਬਣਾ ਸਕਿਆ, ਜਦਕਿ ਭਾਰਤ ਨੇ 5 ਅੰਕ ਬਣਾਏ। ਫਾਈਨਲ 78-40 ਦੀ ਸਕੋਰ ਲਾਈਨ ਨਾਲ ਸਮਾਪਤ ਹੋਇਆ ਅਤੇ ਭਾਰਤੀ ਮਹਿਲਾ ਟੀਮ ਪਹਿਲੀ ਵਾਰ ਵਿਸ਼ਵ ਕੱਪ ਚੈਂਪੀਅਨ ਬਣੀ।